«Өлшем бірліктерін қамтамасыз ету туралы» Қазақстан Республикасының 2000 жылғы 7 маусымдағы Заңының 5-бабына сәйкес уәкілетті орган, яғни Қазақстан Республикасы Индустрия және сауда министрлігінің Техникалық реттеу және метрология комитеті (бұдан әрі – техникалық реттеу және метрология комитеті) Қазақстан Республикасының өлшем бірліктерін қамтамасыз етудің мемлекеттік жүйесі тізілімін (бұдан әрі - тізілім) жүргізуді ұйымдастырады.
Өлшем бірліктерін қамтамасыз етудің мемлекеттік жүйесі тізілімі – өлшем бірліктерін қамтамасыз ету саласындағы жұмыстарға қатысушы объектілер мен құжаттарды тіркеу есебінің құжаты.
Тізілімді жүргізу Техникалық реттеу және метрология комитетінің 2005 жылғы 18 қарашадағы бұйрығымен бекітілген, тізілімді жүргізудің құрылымына, мазмұнына және тәртібіне қойылатын негізгі талаптарды белгілейтін Қазақстан Республикасының өлшем бірліктерін қамтамасыз етудің мемлекеттік жүйесі тізілімін жүргізу ережелеріне (бұдан әрі - Ереже) сәйекс жүзеге асырылады.
Тізілім объектілерін тіркеу олардың есебін ұйымдастыру, Қазақстан Республикасының мемлекеттік өлшем бірліктерін қамтамасыз ету жүйесінің ақпараттық деректерінің орталықтандырылған қорын құру және тізілім объектілері бойынша ақпаратпен жүйелік қызмет көрсету мақсатында жүзеге асырылады.
Техникалық реттеу және метрология комитеті тізілімді жүргізуді мына бөлімдер бойынша жүзеге асырады:
- 1-бөлім шама бірліктерінің эталоны;
- 2-бөлім бекітілген өлшем бірліктерінің түрлері;
- 3-бөлім заттар мен материалдардың құрамы мен қасиеттерінің бекітілген стандарттық үлгілерінің түрлері;
- 4-бөлім өлшем құралдарын салыстырып, тексеру әдістемелері;
- 5-бөлім өлшем құралдарын өндіру және жөндеу құқығына лицензиаттар;
- 6-бөлім аккредиттеу объектілері;
- 7-бөлім өлшемдерді орындау әдістемелері;
- 8-бөлім метрологиялық аттестаттаудан өткен өлшем құралдары.
Тізілім ресми ақпарат көзі болып табылады. Тізілімде бар мәліметтер негізінде мүдделі мемлекеттік басқару органдарына, жеке және заңды тұлғаларға (оның ішінде шетел мемлекеттерінің) ақпараттық қызмет көрсету жүзеге асырылады.
Тізілім деректері туралы ақпарат Техникалық реттеу және метрология комитетінің кезеңдік басылымдар мен арнайы ақпараттық жинақтарда жарияланады және сұрау салу бойынша Қазақстан Республикасы мүше болып табылатын өңірлік және халықаралық ұйымдарға жіберіледі.
Сондай-ақ ҚР МӨЖ тізілімінің ақпараты www.kazinmetr.kz web-сайтында орналастырылған. Бұл ақпаратты алу үшін мемлекеттік ғылыми метрологиялық орталықтармен қызмет көрсетуге алдын ала шарт жасасу қажет.
